ᱱᱳᱣᱟ ᱫᱟᱜᱫᱚ ᱨᱟᱦᱟᱢᱜᱮᱭᱟ!
ᱢᱤᱫ ᱟᱹᱱᱟᱹᱲᱤ ᱡᱟᱹᱛᱨᱤ,
ᱟᱛᱩᱜᱠᱟᱱ ᱡᱷᱟᱨᱱᱟ ᱫᱟᱜ,
ᱟᱧᱡᱽᱞᱮ ᱨᱟᱠᱟᱵ ᱠᱟᱛᱮᱫᱼᱮ,
ᱥᱤᱲᱩᱵ ᱠᱟᱱᱟ,
ᱦᱟᱱᱟᱥᱟ ᱰᱷᱤᱯᱨᱮ ᱢᱤᱫ ᱦᱚᱲ,
ᱥᱟᱦᱟᱱᱮ ᱢᱟᱜᱢᱟᱜ ᱠᱟᱱᱟ᱾
ᱟᱹᱱᱟᱹᱲᱤ ᱡᱟᱹᱛᱨᱤ,
ᱩᱱᱤ ᱦᱚᱲ ᱥᱮᱡ ᱦᱚᱦᱚᱣᱟᱛᱮ!
ᱦᱮᱱᱫᱟ ᱦᱚᱹ ᱟᱧᱡᱚᱢᱮᱫᱟᱢ?
ᱱᱳᱣᱟ ᱫᱟᱜ ᱫᱚ ᱵᱷᱟᱞᱟ,
ᱳᱠᱟ ᱠᱷᱚᱱ ᱟᱹᱛᱩ ᱦᱤᱡᱩᱜᱠᱟᱱᱟ?
ᱩᱱᱤ ᱦᱚᱲ ᱢᱮᱥᱠᱚᱡᱽ ᱛᱩᱞᱩᱡᱼᱮ ᱨᱩᱣᱟᱹᱲᱟᱫᱮᱭᱟ,
ᱱᱳᱣᱟ ᱫᱟᱜᱼᱮᱢ ᱢᱮᱛᱟᱜᱠᱟᱱ,
ᱱᱳᱣᱟ ᱟᱥᱚᱞᱨᱮ ᱫᱟᱜ ᱫᱚ ᱵᱟᱝ ᱠᱟᱱᱟ,
ᱱᱳᱣᱟᱫᱚ ᱵᱤᱨᱨᱮᱱ ᱵᱚᱝᱥᱚᱣᱟᱜ ᱢᱮᱸᱫᱫᱟᱜ ᱠᱟᱱᱟ,
ᱵᱤᱨ ᱵᱩᱨᱩ ᱨᱚᱰᱚᱡ ᱥᱟᱨᱮᱡ ᱨᱟᱥᱟ ᱠᱟᱱᱟ᱾
ᱟᱹᱱᱟᱹᱲᱤ ᱡᱟᱹᱛᱨᱤ ᱥᱮᱥᱨᱮ,
ᱱᱳᱣᱟ ᱢᱮᱱᱠᱟᱛᱮᱫᱼᱮ ᱥᱮᱱᱡᱚᱝᱠᱟᱱᱟ,
ᱡᱟᱸᱦᱟᱸᱱ ᱫᱟᱜ ᱥᱮ ᱨᱟᱥᱟ ᱠᱟᱱᱜᱮ,
ᱢᱮᱱᱠᱷᱟᱱ, ᱱᱳᱣᱟ ᱫᱟᱜ ᱫᱚ ᱨᱟᱦᱟᱢᱜᱮᱭᱟ᱾
